Жаңабай Баймуратов

ҚАРЕКЕҢНИҢ МЕҲИРИН

АЙТ..... МЕҲИРИН .

Көзинше мен көп мақтасам кешириң ,

Мийман болдым көрдим сонда тәсирин .

Тик аяқтан турып хызмет етеди ,

Қарекеңниң меҳирин айт.....меҳирин .

Қонақ десе , дәрўазасы ашыўлы ,

Дастурханда түрли жемис шашыўлы .

Тағам таярлаўда меҳир қосыўлы ,

Қарекеңниң меҳирин айт... меҳирин .

Ишип жеўден ойламайман бөгиўди ,

Бар тапқаны қонағына төгиўли .

Көлик десең арба атқа жегиўли ,

Мийман десе меҳирин айт... меҳирин .

Ул - қыз , келин болар хызмет жолында ,

Суў алып жүр мыс қуманы қолында .

Пәтияны алар аўқат соңында ,

Қарекеңниң меҳирин айт ...... меҳирин .

Балық үнсиз суўға қуўысқанындай ,

Дослыққа беллерин буўысқанындай .

Жибергиси келмес туўысқанындай ,

Қарекеңниң меҳирин айт.... меҳирин .

Әдеп дәстүрлерин ядында сақлап ,

Келген мийман ушын отырар бақлап .

Жеткизер не керек барлығын тақлап ,

Қарекеңниң меҳирин айт меҳирин .

Бабалар ардақлап өткен жерим бар ,

Суўы кем болсада , дәрья көлим бар .

Мақтанышлы Қарақалпақтай елим бар ,

Қарекеңниң меҳирин айт.... меҳирин .

Жаңабай Баймуратов.

    Қарақалпақстан республикасы